مقالات

العمارة أيله للسقوط

بقلم : عصام طاهر

ايوه يا بيه العمارة أيله للسقوط

وبتوع الحي قالوا كده و التقارير كلها بتقول كده بس السكان مش عاوزين يفهموا وعماليين يقولوا هنعمل ترميم وف الأخر هتقع علي نافوخ اللي جابوهم وهتبقي كارثه

اهو ده بالظبط حال البلد .. هو مش تشاؤم بس هو نظره علي أرض الواقع

ده علي اعتبار اني بفهم اوي وعندي مخ اسم الله

بالراحة كدة وتعالوا نحسبها سوا

– احنا عملنا حاجه العالم كله انبهر بيها .. ده علي اعتبار ان مكنش بيتلعب بينا يعني المهم يعني خلينا نحسبها من ساعة ما الرئيس حسني اعلن التنحي حصل ايه ؟

ولا اي حاجه جرينا كلنا .. زمامير ورقص و غنا وعماليين نبوس ونحضن ف بعض و هييييييييييييه و احتفالات بس محدش وقف لحظه وقال طب هنعمل ايه؟

او ايه الخطوة اللي بعد كده ؟

من الأخر كدة محدش كان عنده اي فكر وكل واحد بيتحرك مع نفسه وعلي حسب اللي هو شايفه مافيش تخطيط ولا قيادة

المهم سلمناها للمجلس العسكري اللي هو اصلا تبع نظام مبارك .. نكمل معلش استحملوني

المجلس راح مسلمها للأخوان اللي هم اوسخ من اي نظام اتخلق .. واحنا عماليين نتظاهر ونتخانق ونشتم في بعض و نلعن ونسب مليون ملة

والله اكبر وماشاء الله عندنا جهاز اعلام يعملك من الفسيخ شربات ومن البحر طحينة وممكن يقنعك ان امك اصلا تبقي اخت ابوك ومتجوزين في الحرام و هتقتنع في الأخر

وبصراحه اخلع القبعة للي ماسك اللعبة دي علشان هو معلم بجد عرف يلعب صح ويحرك الناس والدنيا كلها علي مزاجه

المهم .. كملنا كده ونزلنا للمره العاشره بنقول لا ومش عاوزين اخوان وملعون ابوهم علي ابو حكمهم .. ولا للفاشيه الدينيه

بس كان فيه بديل ؟

لا

عندنا اي خطه ؟

برضوا لا

روحنا نازلين مظاهرات تاني وقلنا للجيش انزل احمينا والحقنا يا سيسي .. اتحرك يا سيسي .. اغضب يا سيسي .. وخد القرار يا سيسي

وهووب السيسي خد القرار وشال الأخوان

قامت ناس ترقص تاني وتحتفل …. نفس السيناريوا الاولاني لا جملة نقصت ولا مشهد زاد

طب يا جدعان من اللي هيحكم ؟

مين اللي هيمسك ؟

البلد هتبقي ماشيه ازاي ؟

ولا الدموع يا معلم كله قاعد متنبل ورمي الكورة في ملعب السيسي والجيش وده طبيعي جدا من الشعب المصري

شعب عايز اللي يفكرله ويأكله ويلبسه من غير ما يفكر

المهم قعدنا بقي نخش في تفويض وارهاب ورابعه والنهضة و الأعلام الله ينور عامل الدور بتاعه زي ما الكتاب بيقول وأكتر

وهوب السيسي مسك البلد مسك وقالك نهدي بقي ونستقر عشان نشوف هنعمل ايه

طب هي مشكلتنا في مين اللي ماسك البلد ولا في ان اساسات البلد نفسها باظت و البلد أيله للسقوط

تعليم مفيش

صحة مفيش

بنية تحتية مفيش

اخلاق مافيش

فكر مافيش

اعلام مافيش

عقول و تنوير مافيش

فن مافيش

اعلام مفيش

من الأخر كدة البلد كلها مافيش

كل اللي هامم الشعب ده الأكل والمزاج وبس

طب فكرنا من دلوقتي مين اللي هيمسك مصر بعد السيسي .. طبعا لأ

ولا اي مخلوق يعرف

احنا بقينا اكتر جهلا واكثر تخلفا عشان بغبائنا ضيعنا كل حاجه من ادينا

وراجعين تاني عايزين ننزل و نتظاهر و نكرر نفس الغلطه عشان بطننا والاسعار مع العلم ان لو ده حصل الأخوان هيركبوا السلطة وركوب مش هيبقي فيه نزول تاني وهنفضل كده نلف في دواير ومحدش هيفكر يخرج من المصيبة اللي ممكن نقع فيها لاننا شعب مش بيفكر .

طب بلاش ده كله حد يقدر يقولي مين هيرشح مين عن اي دايره في مصر في مجلس النواب؟ حد عنده ناس يكون واثق في انتمائهم للشعب وللبلد ؟

حد يعرف اي حاجه اصلا ؟

طبعا لأ

طب حد فينا فكر يبتدي يشتغل علي الأرض في صورة مجموعات توعيه سياسيه حتي علي نطاق الأصدقاء ؟

طب حد فينا فكر انه يعمل مجموعات لمراقبة أداء المحليات و الحكومه في منطقة سكنه و يرصد اللي بيحصل بدل ما هي ماشيه بظرميط كده؟

والله العظيم المشكله فينا احنا مش ف اي نظام

ماهو انا وانتوا أو أي حد مسك البلد وفيها ناس نايمة وتنابلة ومش بتفكر ولابتفهم يبقي عليه العوض في البلد كلها

احنا شعب مِسلم ودنه لأحمد موسي و اماني الخياط و توفيق عكاشة وعمرو اديب و لميس الحديدي و تامر امين و باقي الأعلامين اللي هما اصلا مش عارفين الفرق بين الألف وكوز الدره.

الموضوع بقي مقرف و مستفز ومش مطلوب مننا اننا نموت تاني و ناس تروح بدون اي سبب او أي هدف شغلو مخكوا بقي والحقوا العماره اعملولها تنكيس قبل ما تقع وكلنا نروح في ستين داهية

سيبوا السيسي يشتغل وبدل ما ينكس العمارة وتاخد وقت ويجيلها قرار ازالة . يهدها ويبنيها من جديد . عمارة تستحمل واساسها قوي تستحمل زلازل الدنيا كلها

الراجل مقالش هنكس العمارة وتسكنوا فيها

الراجل قال استحملوني لحد ما ابنيها ونعيش فيها كلنا

كفاية هرتلة بقا لان احنا كمصريين مش هيجيلنا جلطة في المخ . لان معندناش مخ اصلا

كفاية بقا بقينا اضحوكة الدنيا كلها

في النهاية . ربنا يقويك ياريس وتقدر تبنيها وباذن الله هنستحمل معاك

اترك تعليقاً

زر الذهاب إلى الأعلى
Verified by MonsterInsights