بقلم :عصام طاهر
– الله أكبر .. الله أكبر .. أذان الظهر
– يارب يارب بحق ده الآدان تنجح يا عصام يابن بنتي وأشوفك دكتور أد الدنيا
– ياستى بس أنا فى تجارة
– وماله يابنى هو يكتر على ربنا ده ربنا قادر على كل شئ
– ياستى ونعم بالله بس اللى بيطلع دكتور لازم يكون فى كلية الطب مش التجارة
– ياللا تجارة تجارة .. ومالها التجارة يعني
ده حتى التجارة شطارة
ده جدك الله يرحمه كان تاجر أد الدنيا
– ياستى التجارة اللى ف السوق حاجة واللى ف الكلية حاجة تانية
– ع العموم شد حيلك أنت وانا أخلى جدك يخدك معاه عشان تتدردح وتتودك كدة فى السوق
– جدى إيه اللى هايخدنى معاه ياستي
ده جدى مات من زمان
– يامصيبتى السودة هو عبد الواحد مات ياحبيبى ياأخويا
مكنش يومك ياسبعى
– ياستى ده ميت من تلاتين سنة
– تلاتين سنه .. ده العمر بيجرى ياولاد تصدق ولا حسيت بيهم ياللا أهو غار فى داهيه
قطع وقطعت سيرته
ده كان بخيل بخل الدنيا ده عمره ما دخل عليا ببطيخة ولاكيس جوافة
– ياستى حرام عليكى عايز أذاكر بقى
– يوووه .. وأنا ماسكاك ياوله .. ذاكرعشان ربنا يكرمك وتنجح وتاخد الدبلون
– ياستى دبلون إيه أسمه البكالوريوس
– أنت بتضحك عليه ياوله
أسمه الدبلون الواد ابن فايزة جدع زيك كده فى مدرسة التجارة وخد الدبلون
– خلاص دبلون دبلون ياستى بس سبينى بقى عشان أذاكر
– ذاكر .. ذاكر ياخويا ذاكر
– تعرف ياواد .. ندرن عليا يوم ماتنجح لأكون رايحه خطبالك عبير بت رئيسه
أدب ايه وأخلاق ايه وعلام كمان
– ياستى عبير دى في الاعداديه
– وماله يابنى .. الراجل مايعبهوش إلا جيبه
– راجل .. راجل مين ياستى
عبير دى بنت
– عبير مين ياوله .. أنت بتعرف بنات من ورانا؟
– لا إله إلا الله
أبوس رجلك ياستى أرحمينى بقا
-طب ذاكر
ذاكر جتك نيله وأنت طالع براوى كده زى أمك
قطعت وقطعت سيرتها
أنا مش عارفه أبوك كان أتجوزها على إيه
حكم قال لبس البوصة تبقى عروسة
بس واللى نبى النبى نبى لكون مبوظه الخطوبة دى ومجوزاه أنيسة بت أختى
– ياستى خطوبة إيه
أبويا مجوز أمى من خمسة وعشرين سنة
وبعدين أنيسة دى بنت أخوكي مش بنت أختك
وأساسا إنتى ملكيش إخوات بنات
-صحيح ياوله
أنت عندك حق أنا مليش إخوات بنات
أصلى أنا امى ماكنتش بتخلف صبيان
-حراااااااااااااااااااااااااااااااااام
بقولك ايه ستى ماتطلعى البلكونة شويه
ده الهوا حلو اوي بره
– لأ ياخويا .. فى جدع كده حليوه وشعره مسبسب فى البلكونه اللى فى الوش بيقعد يعاكسنى
– خلاص روحى المطبخ .. أهو زمان أمى خلصت الرز
– رز إيه يابنى
هوأنا ليه سنان للرز
أنا هطلع البلكونه أحسن
– طب خلى بالك م الهوى ياستى
– هوى لما يلطشك عربجي زي امك
