قبل الدخول في اي علاقة جديدة احذر هذه الأشياء … للاستشارية النفسية “رانيا شكري”
تعتبر العلاقات الجديدة في حياتنا من اهم ما يجب ان نهتم به جديدا ، حيث يمكن أن تكون بداية لتغيير حقيقي لنا للأفضل وربما تكون للأسوأ ! .. وفي هذا المقال توضح لنا الاستشارية النفسية “رانيا شكري” 12 نقطة هامة يجب ان نهتم بها جيدا قبل الدخول في اي علاقة جديدة :
١-ازاي الشخص ده بيتعامل مع الناس اللي حواليه وخصوصا مع الناس اللي ليه سُلطه عليهم ؟
٢–الكذب ..الكذب …الكذب …ده مؤشر في منتهى الخطورة. خليك مصحصح ليه جدا.
٣-علاقته بأبوه وأمه شكلها ازاي؟
٤-كريم ولا بخيل والكرم هنا مش بس كرم فلوس لأن بخل المشاعر بيبوظ العلاقه اكتر؟
٥-واضح في اللي عايزه منك ولا بيلف ويدور او مش عارف هو شخصيا عايز ايه؟
٦-ازاي بيتعامل لو عندك مشكله معينه. بيسمع وبيحاول يتفهم ولا بيقلبك بدري بدري علشان يريح دماغه؟
٧-هل القعده كلها بيقضيها كلام عن نفسه وعن مشاكله وظروفه وأحلامه وناسيك تماما ولا الكلام رايح جاي بينكم؟
٨-ايه أهدافه في الحياه عموما وهل بتتعارض ولا مبتتعارضش مع اهدافك؟
٩-ايه اسباب فشل علاقاته اللي فاتت لو فيه ( ركز في دي علشان اوقات بيبقى فيه نمط بيتكرر)؟
١٠-ازاي بيتكلم عن صحابه والناس اللي قريبه منهم..يعني كلامه كله سلبي وتقطيع فروه ونميمه ولا متوازن، لان ده هيبقى مؤشر كبير على طبيعه شخصيته وتربيته وتعاملاته معاك في المستقبل؟
١١-هل مركز في اللي بتقولهوله ولا مش مهتم بتفاصيلك اصلا ومش فارق معاه؟
١٢-ازاي بيتعامل وقت المشاكل بينكوا. بيقفل عليك وبيديلك وش ولا بيتخانق ويزعق ويشتم …ولا بيحاول يتواصل بشكل عاقل.
