سمعنا ناس بتهرى وتتكلم عن موضوع الألومنيوم فويل والطهى فيه وهل ده صحى ولا مش صحى ..
طيب تعالوا واحدة واحدة نعرف ايه هو الموضوع
أولا ايه ورق الألومنيوم :
ده شيت صغيربيلمع بيكون سمكه حوالى 0.2 مم مصنوع بعملية اسمها الدرفلة (الترقيق)
بنستخدمه فى ايه؟
تغليف الاكل وحفظه والعزل والطهى أو الطبخ
طيب نيجى للسؤال المهم هل الألومنيوم مضر للجسم
طبعا مضر جدا .
طيب احنا بيدخل جسمنا ألومنيوم من الأكل اللى احنا بناكله ؟
أه يوميا الألومنيوم موجود بنسب صغيرة فى حاجات طبيعية زى الفواكه , الخضار,اللحوم , الأسماك ومنتجات الألبان ..
.فى مواد تانية بتجمع الومونيوم بنسب عالية زى ورق الشاى والمشروم و السبانخ والفجل ..
الالومونيوم موجود كمان فى الأطعمة المصنعة بيكون على هيئة مواد حافظة , مكسبات اللون والطعم , بس الأطعمة المصنعة بتكون نسبة الالومونيوم عالية فيها شوية عن باقى المواد الطبيعية .
كمان الالومونيوم موجود فى بعض الأدوية زى مضادات الحموضة
كل الألومونيوم اللى بيدخل الجسم من المصادر اللى قولناها ؛؛؛ النسب دى الجسم بيعرف يتعامل معاها وبيخرج الألومنيوم فى عمليات الاخراج.
طب ايه موضوع الطبخ فى ورق الالومونيوم ؟
الدراسات وضحت ان الالومونيوم الزيادة بييجى من الحاجات الالومونيوم اللى بنطبخ فيها وورق الألومنيوم المستخدم فى الطبخ.
يعنى كده موضوع الطبخ فى ورق الالومونيوم بيزود نسبة الالومونيوم فى الجسم ؟
ايوة بالظبط كده ..بس خلى بالك
فى شوية حاجات لازم تاخد بالك منها زى
1: درجة حرارة الطبخ
2: الأطعمة الحمضية اللى بتضيفها وانت بتطبخ زى الطماطم والليمون والكرنب
3: التوابل والملح
كل الحاجات دى بتخلى نسبة الالومونيوم اللى بيدخل جوة الاكل كتيرة
يعنى شوى اللحمة الحمرا لمدة 60 دقيقة عند 150 درجة بيخلى نسبة الألومونيوم تزيد فى اللحمة من 89% الى 378 %
طب كده الموضوع خطر جدا
لا متقلقش مش خطر أوى
ازاى؟
مفيش دليل قوى حتى الان بيربط بين زيادة نسبة الألومنيوم بسبب الطبخ ووجود الامراض..
طب ايه قصة الزهايمر والألومونيوم
العلماء عملوا تحليل لأدمغة الناس اللى عندهم زهايمر لقوا تركيزات عالية من نسبة الالومونيوم فى المخ بس هل الالومونيوم ده جى من الأكل ؟
مش اكيد لأنهم ممكن يكونوا بياخدوا أدوية فيها نسب الومونيوم عالية ..طب كده قدرنا نربط بين الألومونيوم ومرض الزهايمر بس ازاى الألومنيوم بيطور مرض الزهايمر محدش اكتشف ده لحد الان ..يبقى كده نقدر نقول ان زيادة نسبة الالومونيوم فى الطعام ممكن تكون عامل مساعد فى زيادة نسبة الالومونيوم فى الجسم وبالتالى تتسبب فى مرض الزهايمر.
طب ايه نسبة الالومومونيوم الطبيعية فى الجسم ؟
منظمة الصحة العالمية WHO
وادارة الأغذية والأدوية FAD
قالوا ان نسبة الالومونيوم اللى المفروض تدخل الجسم متزيدش عن 2 ميلليجرام لكل كيلو من وزن الجسم فى الاسبوع , يعنى لو وزن سيادتك 60 كجم المفروض نسبة الالومونيوم اللى تدخل جسمك فى الاسبوع متزيدش عن 120 ميلليجرام
هيئة سلامة الاغذية الأوروبية EFSA حبكتها شوية وقالت ان النسبة فى جميع الاحوال متزيدش عن 1 ميلليجرام لكل 1 كيلو جرام من وزن الجسم .
فى الغالب النسبة مبتزيدش عن كده بس ممكن تزيد لو سيادتك بتتعرض للألومونيوم فى اكلك كتير ..
عشان كده
1: متطبخش الاكل فى ورق الومونيوم عند درجات حرارة عالية.
2:تجنب قدر المستطاع الطبخ فى ورق الالومونيوم خصوصا مع الاطعمة الحمضيو زى الطماطم والليمون .
3: استخدم أوانى الطهى اللى مصنوعة من مواد تانية غير الالومونيوم زى التيفال والفخار .
4:النقطة المهمة ان الكل اللى مطبوخ جوة البيت مهما كانت درجة العك فيه مش هييجى اوسخ وأقذر من الأكل المصنع والمعبا والمغلف فى ورق الومونيوم ..لانه غير انه مغلف فى الومونيوم المواد الحافظة فيها نسب الومونيوم عالية .
فى النهاية
ورق الالومونيوم مش خطر بس بيزود نسبة الالومنيوم فى الاكل اللى بناكله لو انت واخد بالك من نسبة الالومونيوم اللى بتدخل جسمك وبتحافظ عليها أقل من الارقام اللى قولنا عليها ..قشطة مفيش مشكلة ..لو غير كده متستخدمش أى حاجة ليها علاقة بالالومونيوم وانت بتطبخ.
