كتبت : منار المنياوي
عندما تسعى فيدبر لك القدر امورك لتكون باعث للسرور فتمتلك كاريزما مبهجة يشهد بها من يراك أو يسمعك لتصبح من أوائل من باشر في محطة اذاعية عنوانها الطاقة (Energy) ليسمعك كل مهموم فتخفف عنه الأضا فيعلم أن ( أضا أخف من أضا ) .
محمد طارق أضا ممثل ومذيع برنامج ( أضا أخف من أضا ) ، ولد في 14 سبتمبر 1993 ، سعي كثيرا ليحقق أحلامه ومازال يسعى ليصل الى هدفه ، وفي حوار للدليل نيوز فتح قلبه ليروي تفاصيل مشوار نجاحه.
ما هي طبيعة برنامج أضا أخف من أضا ؟
هو كاركتر معمول فالبرنامج سوبر هيرو مصري ( أول سوبر هيرو بيحارب النكد والاكتئاب ) عن طريق انه بيشغل اغاني حلوه على الراديو ، بيلعب مع الناس وبيتكلم في مواضيع مختلفة ، بنلعب و بنغني وبنمثل على الهوا فابيغير مود الناس من سيء لأفضل علشان كدا سوبر هيرو ضد النكد اسمه ( أضا أخف من أضا ) وهو اسم البرنامج.
تفاصيل بدايتك كمذيع راديو ؟
من أول ما دخلت الجامعة وانا عندى شغف بالراديو حابب الراديو جدا ، بدأت في أكتر من مكان راديو اون لاين بدأت مع أستاذ ( طارق علام ) كان عنده راديو اون لاين اشتغلت فيه فتره ، وبعد كده عملت اتنين راديو اون لاينز وكانوا كويسين جدا ، وبعد كدا الأكاديمية عندي عملت راديو اون لاين انضميت ليه فتره لحد ما فضلت اسعى من 2011 علشان اكون موجود في راديوFm مش مجرد راديو اون لاين ، لحد ما الحمد لله ربنا وفقني وقدرت اكون من الكرو اللي بدأ راديو ( Energy) في مصر 2017 .
تفاصيل بدايتك كاممثل ؟
انا خريج أكاديمية الجزيرة 2015 اعلام اذاعة وتيلفزيون بدأت في مسرح الأكاديمية وبعد كدا دخلت معهد فنون مسرحية قسم تمثيل واخراج وانا فالمعهد اشتغلت في اعمال منهم دور صغير جدا في ظل الرئيس وأدوار في البلاتوه مع ( أحمد أمين ) ، واشتغلت في مسرح أمين وشركاه ، واشتغلت اخر حاجه في فيلم ( يوم وليلة ) بطولة شبابية هو المفروض ينزل السنادى بس كورونا بوظت حاجات كتير بس الفيلم حلو ، فيلم بطولة حنان مطاوع وخالد النبوي و احمد الفيشاوي و دره ، أنا طالع أخو حنان مطاوع وده كان من حسن حظي اني امثل قدامها ، ممثلة محترمة و محترفة واتعلمت منها كتير جدا في وقت الشغل معاها .
طموحك للقادم ؟
افضل مكمل و اتحسن وفي فترة أكون من أفضل المذيعين في مصر و ان شاء الله أكون أفضل مذيع في مصر.
_ شكرا ليك وبتمنالك التوفيق.
شكرا جدا ليكي.
