هتفضل جملة ” أهالينا هما السبب ف إلى إحنا فيه ” اول جملة كتبتها ف حياتى ف مجال الكتابه لا تنسي ولو عدى عليا عمر فوق عمرى ..
فاقد الشئ يعطيه بقوة! ضحايا النرجسيه بيعوضوا كل شئ مع أولادهم .. البنت اللي مشفتش حنيه من أمها ولا حتى كلمه حلوة بتحاول بكل قوتها تكون أم حنونه ومعطائه وتدي بنتها كل الحب والرعايه اللى مفتقداها وبتشوف نفسها مكان بنتها وفي سنها وكان نفسها تسمع كلمات ايجابيه من أمها مش كلام سلبى زى السم وإهانة وشتايم طول الوقت … بشوف نماذج كتير لضحايا بيعوضه أطفالهم بكل طاقتهم .. لو بنت عانت من التفرقه بينها وبين أخواتها سواء ولادد أو بنات بشكل عام دايما عند أمها ! هي بتحاول تبعد عن أى تفرقه بين أولادها .. وبتعاملهم سواسيه وبتخلي الإبن يعطف علي اخته ويحبها والأخت وهكذا ..
البنت اللي طول عمرها مسمعتش كلمه حلوة من أمها لم بتخلف بنت بتعامل بنتها بايجابيه وبتساندها وبتدعمها بالكلام والمواقف الكلمه بتفرق فى كلمه بتطلعها ل سابع سماء وكلمه بتنزلها ل سابع ارض بردو … كل حاجه اتحرمت منها من كلمه حلوة من حضن دافئ من دعم نفسي كل حاجه اتمنتها بتعوضها مع أطفالك …
الاذي النفسي ال بتسببه الأم ل بنتها وأنها تشوهها نفسياً من جواها بتحاول طول الوقت تداريه وتقول بنتى هخليها تصلحنى من جوا قدام امى عملت كدا عمرها م هتفكر تعمل كدا ف بنتها … اصلها شربت وجربت وعاشت كتير ف مش هيهون عليها تخلى بنتها تجرب وتشرب من ال عاشته وجربته
ضحيه النرجسيه بتكون أم حنونه جداً وحساسه ولو انتكست وعملت موقف مقرر من شخصيه أمها بتتراجع وبتعتذر لأطفالها وبتفوق نفسها أول بأول وتقول مش ممكن أعمل زي أمي أبدا مش ممكن بنتي تعيط بسببي
ضحيه الأم النرجسيه برغم إنها مهزوزة وثقتها في نفسها ضعيفه لكنها بتقوي طفلتها وبتتمني من كل قلبها إنه بنتها تكون أحسن وأحسن ومتحسش أبدا بأى شعور هي حسيتوا وهي في سنها ضحيه الأم النرجسيه محتاجه حب وحنان بتديه لبنتها بكل قوة .. بحس إننا إحنا اللى محتاجين حضنهم مش هما .. إحنا بنستقوي بيهم جدآ
لو كانت أمك بتبوخك وبتعنفك وواقفه ضد رغباتك وبتحاربك ودايما بتحبطك وتقلل منك تأكدي إنه عمرك ما هتعملي دة مع بنتك أبدا .. هتشوفي هي نفسها في إيه وتعمليه هتحفزيها وتدعميها وتحتويها وعمرك ما هتفشي سر ليها زي ما أمك كانت بتفضحك لم تقوليلها سر وتقلب عليكي الطرابيزة وتفضحك قدام اهليكم ! لو أمك وقفت قصادك عشان متدرسيش حاجه إنتي حباها تأكدي إنك مش هتعملي كدة أبدا مع بنتك وهتشوفي بس هي نفسها تدرس إيه وهتجري تقدميلها وكانك بتقدمي لنفسك ونفس شعورك اللى كنتي تتمني أمك تحسه وتدعمك وتساندك لو أمك فرقت بينك وبين حب حياتك ووقفت قصاد سعادتك وحاربتك تأكدي إنك عمرك ما هتعملي كدة أبدا مع بنتك
وهدوري علي راحتها وسعادتها مع الإنسان اللى قلبها اختاروا لأنك مجربه وعارفه الشعور دة كويس جدا وقد إيه مؤلم إنك تفارقي حد حبتيه وقد إيه صعب ومستحيل تحبي بعدة ولو بعد سنين وسنين وقد إيه أمك حطمتك وحطمت قلبك وحكمت عليكي بالجحيم
لو أمك دايما تبوخك وتقولك إنتي وحشه وشكلك وحش وشعرك وحش وتخينه وفاشله ومش فالحه في حاجه ! تاكدي إنك عمرك عمرك ما هتعملي كدة مع بنوتك لأنك عارفه كويس جدا جدا تأثير الكلمات القذرة دي علي نفسيتك وثقتك بنفسك لو أمك عمرها ما اخدتك في حضنها
هتلاقي نفسك بتحضني أولادك كل شويه وبتدي حب حب واهتمام وحنان هتلاقي نفسك بتقولي لبنتك كل كلمه كان نفسك ماما تقولهالك كل موقف كل شعور كان نفسك تحسيه كان نفسك تعشيه كان نفسك تحققيه كان نفسك تطبطب عليكي وتقولك إنتي حلوة ومؤدبه وبنت جميله واحلي بنت في الدنيا .. اطمني هتعوضي كل دة مع بنتك كل آمالنا في الحياة إنه نطلع أجيال سويه وأجمل حاجه ممكن نقدمها ليهم أنهم ميطلعوش زينا
أعظم حاجه نقدمها لابناءنا إننا منكنش سبب إنهم يزوروا دكتور نفسي بسببنا دي أعظم حاجه ممكن نقدمها ليهم أعظم من الماديات وكل شيئ مرئي وملموس .. نفسيتهم أهم أهم من كل شيئ إحنا برغم ثقتنا المهزوزة وشعور عدم الإستحقاق والعقد والأمراض اللى اهالينا سببوهلنا وبرغم إنه التعافي صعب جدا علينا ولكننا ومع ذلك مازالت قلوبنا رقيقه طيبه وهدفنا نعوضهم هما ونشوف نفسنا فيهم هما يارب نقدر جميعاً نكون أمهات سويات يارب نكون الأمهات اللى كنا نتمناها
ضحيه الأم النرجسيه انسانه طيبه ومسكينه وحنونه اكتر من أى حد وبرغم كل اللي عاشته لكنها عندها قدرة علي العطاء للحب والرعايه والاهتمام وعايزة تتعلم وتبقي أحسن أم لابناءها ربوا بناتكن تربيه سليمه سواء نفسياً أو جسدياً متعقدوهمش من وهما صغيرين علشان لما تربيلهم عقدة تفضل تكبر جواهم ومعاهم طول م هما بيكبروا حبوا بناتكن دا أشرف الخلق قال عنهم حديث مخصوص للبنات… عن عقبة بن عامر رضي الله عنه قال: قال رسول الله صلى الله عليه وسلم: «لا تكرهوا البنات فإنهن المؤنسات، الغاليات، [الـمُجَهّزات]». افهموا معنى الحيث شوفوا جمال تفسيره
معنى المؤنسات: أي يستأنس بهن، للطف حديثهن، وحصول أُنس الأبوين والأهل بهن، ولين عريكتهن غالبا.
ومعنى الغاليات: أي عظيمات القدر والقيمة والمنزلة عند الأبوين والأهل.
ومعنى المجهَّزات: أي اللاتي يجهزن لتزويجهن (جهاز العروس).
ويقع اهتمام الأبوين والأهل بذلك، ويحصل لهم من الاهتمام والسرور به ما هو معلوم. بطلوا بقى تسمعوهم كلام سلبي وتعقدوهم خليهم ينشأوا نشأه سليمه مش معنى انهم بيضحكوا وياكلوا ويشربوا يبقى كدا كويسين اتقوا الله في بناتكن.
