اياد عيد (نقل عام) يعتبر نقلة مهمة في حياتي المهنية و ابو العروسة الجزء الثالث تجربة لطيفة

حوار : روان العمدة

صرح الممثل الشاب اياد عيد عن مدى سعادته بالعمل مع الفنانة القديرة سوسن بدر و الفنان القدير محمود حميدة في مسلسل نقل عام ، حيث قال انه يعيش حالة من النشاط الفني في هذه الفترة من خلال المشاركة في عدة اعمال
كما تحدث ايضاً عن تجربته في مسلسل ابو العروسة الجزء الثالث و قال مسلسل ابو العروسة الجزء الثالث كانت تجربة لطيفة جدا و اتمنى اكون ضيف خفيف على الجمهور .

احكيلنا عن دورك في مسلسل نقل عام و احساسك بعد قراءة الدور ؟

دور “حسن” و هو شاب بسيط يتيم الاب و الام .. بيشتغل مع مدام “هالة” اللي بتقوم بالدور الاستاذة القديرة “سوسن بدر”
رشحني للدور “اميرة عبد الظاهر” كاستينج دايركتور العمل و جائت الموافقة من الاستاذ “عادل اديب” مخرج العمل مباشرةً
اول ما اتبعتلي الحلقات و قرأت الدور قلقت صراحة عشان تركيبة مختلفة كتير عن اي حاجة عملتها قبل كدة و كمان مختلف تماماً عن اياد في الحقيقة و ده طبيعي ، كلمت صديقي الممثل و مدرب التمثيل “مصطفي عبد المنعم” و بدأنا نشتغل سوا علي الدور من الحلقات اللي اتبعتت عشان لازم عين تشوف من بره .. دايما اقولها (يا بخت اللي عنده حد صادق يشوفه من بره) و مصطفي بالنسبالي هو الشخص الامين دة ، و الحمد لله وصلت لسكة كويسه لآداء الدور و ان شاء الله يطلع للنور و الجمهور يتبسط .. انا عملت اللي عليا علي قد ما ربنا قدرني و اللي جاي متروك للجمهور .. اتمني ربنا يكرم و ننول قبول الناس
و انا من عادتي مابتفرجش علي أي شغل ليا لما بيتعرض عشان طبيعي الممثل يحس انه كان ممكن يطلع احسن من كده حتي لو عامل حاجه حلوة .. دايماً في احلي ، فإللي بيطلع مبراجعهوش عشان محسش بدة .. و كل دور و له وقته و طباعه الخاصة

هل تجربتك في مسلسل نقل عام اضافت لك ؟
تجربة مفيده جداً علي اصعدة كتير .. اهمها اني عشت فتره كبيره بذاكر الدور قبل التصوير يمكن بثلاث أسابيع ثم 3 شهور تصوير فالفتره دي خلتني احب حسن جداً و اعيش تفاصيل كتير في حياتهُ هو و حتي هذه اللحظة و في اواخر ايام التصوير بعيش معاه بس خلاص هانت و هيروح لحاله .. عشان في ضيف جديد عايز استقبلهُ .. انا بعتبر الادوار اللي بلعبها بمثابة ضيوف خفاف عالقلب بيعيشوا معايا فتره ممتعة و بيروحوا لحالهم
استفادة علي المستوي الانساني و هي اني كسبت بني ادمين كتير اوي من العمل ده علي رأسهم استاذي “عادل اديب” مخرج العمل و الاستاذة “سوسن” و الاستاذ “حميدة”

كلمنا عن الشغل مع الاستاذة سوسن بدر و الاستاذ محمود حميدة ؟

ياه ، اهو ده بقي سؤال هجاوب عليه بقلبي مش بعقلي خالص
ابدأ منين بس ، مافيش كلام يوفيهم حقهم
استاذة سوسن دي كريمة التورتة بجد .. حاجة كدة شياكة في التعامل و تقل في الاداء .. ملهاش وصف
انا ٩٠% من شغلي في المسلسل معاها .. بحس بكمية طاقة حب رهيبة اول ما اشوفها في اللوكيشن صراحة و راحة و سلام نفسي رهيب و انا بمثل قصادها .. ده يا ريت كل الناس استاذه سوسن بجد
حاسس ان عيني بتطلع قلوب دلوقتي و انا عايز احكي عن السينيور حميدة و جمال و كاريزما السينيور حميدة ، سقف التمثيل العالي بجد .. انا بطلق عليه اللقب ده دايماً و انا بحب مدرستهُ جدا و يمكن طريقة شغلي تشبهه .. و لما حد بيقولي كده بتبسط اوي .. و كسبتهُ علي المستوي الانساني جداً و فادني بنصائح كتير سواء في الشغل او في الحياة
شرف عظيم صراحة لأي حد انه يجمعة frame واحد جنب استاذه سوسن و استاذ حميده .. يمكن دي امنية من امنياتي الكبيرة اللي ربنا اراد انها تتحقق

احكيلنا عن كواليس المسلسل و طبيعة التعامل مع طاقم العمل ؟
يمكن صعب اعرف اعبر بالكلام و اخاف انسي حد لو ذكرت اسامي و لكن كواليس العمل ده بالذات ليها مكانه خاصة في قلبي .. كل الناس بتشتغل بحب شديد ، كل الناس خايفة علي الشغل بجد من قلبهم .. بدايتاً من الشركة المنتجة و جميع افرادها مروراً بكاست الاخراج و التمثيل .. معتقدش اني اشتغلت في طاقة حب و راحة بالشكل ده قبل كده .. و اتمني يجمعنا شغل تاني و تالت و رابع
حالة خاصة بالنسبالي اني اشتغل تحت قيادة و توجية استاذ عادل لان فعلا هو فنان خُلُقاً و فناً .. و حقيقي استفدت منه كتير علي المستوي الانساني و الفني من اول شوت في اول مشهد لغاية دلوقتي و انا متأكد اني هستفيد اكتر حتي نهاية التصوير .. خلاص احنا في اخر ايام التصوير لان المسلسل هيتعرض يوم ٢٩ يناير ، السبت القادم

احكيلنا عن طبيعة التصوير من حيث المواعيد و الضغط ؟
من قبل ما يبدأ التصوير و انا متفرغ تماما لمذاكرة الدور و ده طبع من طباعي كممثل بعملهُ دايماً لإن ده عمل و واجب علينا إتفانهُ .. و من اول ما بدأ التصوير و انا ملتزم جداً بالنوم الكويس ليلتها و الاكل المظبوط و الرياضة عشان الشكل من ادوات الممثل المهمه اللي لازم تبقي دايماً كويسة و الحضور من قبل ميعاد الحضور بفترة نص ساعة او ساعة لان ده الصح .. و الممثل الملتزم دايماً سابق الشاطر بخطوة ، ده عموماً نظام حياتي العادية و لكن ببقي ملتزم اكتر بيخ فترات التصوير
الفترة دي الاوقات اتلخبطت شوية لاني بمتحن في المعهد و في نفس الوقت بصور مشاهدي الاخيرة من المسلسل ، ده يمكن مسبب نوع من انواع الضغط البسيط و لكن بحاول ادير الوقت بشكل كويس بين الاتنين لغاية ما يخلصوا

اياد عيد شارك في مسلسل ليه لاء كلمنا عن دورك في المسلسل و مين الي رشحك ؟
ايوة كان ليا مشاركة في مسلسل “ليه لأ ٢” و جة الترشيح من الاستاذ “مودي شاهين” كاستينج دايركتور العمل و اتبسطت جداً اني اشتغلت مع جميلة الروح و الخُلُق الاستاذة “مريم أبو عوف” و اتمني جداً اشتغل معاها تاني ، شئ يشرفني .. اتعرض المسلس من فترة علي منصة إلكترونية و حقق نجاح كبير جداً لانه بيناقش قضية إنسانية مهمه اوي ، و بيتعرض حالياً علي قناة mbc 4 بالمناسبة .. تابعوة هتتبسطوا

اياد عيد شارك في مسلسل ابو العروسة الجزء الثالث كلمنا عن دورك و مين رشحك ؟
مسلسل “ابو العروسة ٣” فكان الترشيح من صديقتي و احد الكاساينج دايركتورز في العمل “هاجر عوض” و مشاركتي بسيطة اتمني اكون ضيف خفيف علي الجمهور زي ما كنت ضيف خفيف علي كاست العمل ، و اتبسطت جداً بالشغل مع الجميلة “نرمين الفقي” كان يوم لطيف
اعتقد ان المسلسل بدأ يتعرض بالفعل علي dmc .. و ده مسلسل لية جمهور عريض من اول جزء فأتمني يحقق نجاح زي الاجزاء اللي فاتت

اياد عيد شارك في مسرحية تو شريت كلمنا عن مشاركتك ففيها و احساسك بالنجاح الي حققته ؟
المسرح و ما ادراك ما المسرح (ابو الفنون) .. اللي معملش مسرح ناقصة كتير اوي من المتعة و الخبرة
“توشريت” هي اخر عمل مسرحي شاركت فيه و تم عرضها في شهر اكتوبر اللي فات ضمن فعاليات مهرجان المسرح العربي (زكي طليمات) و علي الخشبة الأحب الي قلبي خشبة مسرح “المعهد العالي للفنون المسرحية” البيت الكبير بالنسبالي و اللي اتشرف اني طالب فيه .. توشريت كانت من تأليف صديقي المؤلف الشاطر “مينا بيباوي” و اخراج صديقي الموهوب الممثل و المخرج “خالد شكري” و حققت نجاح كبير و اتعرضت بعد المهرجان تاني تحت اشراف الدكتورة “ايناس عبد الدايم” وزيرة الثقافة ، هي اللي طلبت عرضها مرة تانية
و اتمني جداً نعرضها تاني قريب لان دور الملازم “حازم” اللي بجسدة في المسرحية من اقرب الادوار لقلبي

و طول ما انا عايش مش هبطل اشتغل مسرح

كلمنا عن اعمالك القادمة و هل يسعى اياد عيد للبطولة المطلقة ؟
احنا داخلين علي سيزون رمضان اهه و في حاجة بإذن الله و لكن لسه لم يتم التاكيد عليها في رمضان 2022 و هتكون حاجة مشرفة تليق بي و بالجمهور اللي بيتابع ، خصوصاً بعد ما نُلت شرف اني اتواجد في “الاختيار ٢” رمضان اللي فات و الحمد لله كل اللي اتفرج اتبسط جدا و كان عمل مشرف .. فأوعدهم انهم يشوفوا حاجة حلوة رمضان القادم ، لو ربنا اراد اني اكون متواجد فيه

بالنسبة لموضوع البطولة المطلقة فالموضوع ده نسبي بالنسبالي ..
اياد عيد أي دور بيلعبهُ فهو بطولة بالنسبالهُ ، فهنستعجل لية .. كل حاجة بوقتها

مسلسل نقل عام من بطولة محمود حميدة ، سوسن بدر ، احمد بدير ، سميحة ايوب ، ايهاب فهمي ، ميرهان حسين ، ريم البارودي ، مفيد عاشور ، محمد محمود عبد العزيز ، و العديد من النجوم الشباب .. من تأليف وليد خيري و اخراج عادل اديب و الذي من المقرر انطلاقة يوم السبت المقبل علي شبكة قنوات on في تمام الثامنة مساءً