الاحتياجات انواع كتير قوى بس أهمها ف الحياة ال يومنا لازم يكون موجود فيها اهم احتياج ف الدنيا وهو الحضن
الاحتياج للحضن هو واحد من أهم الاحتياجات الإنسانية وأطولها عمرا وأقواها أثرا على الإطلاق.. والاحتياج للحضن زيه زى كل احتياجاتنا الإنسانية..بنتولد بيه ونعيش بيه ومانقدرش نكمل حياتنا بشكل صحى وسليم من غيره.. ونقصه أو عدم إشباعه ممكن يؤدى لكثير جدا من الأمراض أوالأعراض المرضية.. مشكلة الاحتياج للحضن إنه احتياج مزدوج..يعنى هو مش بس احتياج جسدى.. لا.. هو كمان احتياج نفسي.. وفى الحقيقة ده الأهم.. وده الأخطر..
أول علاقتك بالحضن كانت فى اللحظة الأولى لاحتضان الأم لك وانت عمرك ساعات معدودة.. والحضن ده بالذات ليه وظايف مهمة جدا..أبسطها إنه كان بيحسسك بوجودك.. بيحسسك إنك موجود..وأحدث الأبحاث العلمية وجدت إن الحضن الأول ده مهم يكون فيه تلامس مباشر بين أكبر مساحة من جلد الأم وأكبر مساحة من جلد الطفل (اللى يستحسن يكون عريان تماما).. علشان فرق درجة حرارة جلد الأم عن درجة حرارة جلد الطفل بيكون أول حاجة تنبهه إنه مختلف.. إنه متفرد..وبالتالى..إنه موجود..
طبعا الاحتياج للحضن مش بيقف عند هنا.. بالعكس دى بس بتكون البداية..الاحتياج للحضن بيستمر ويدوم ويعيش معانا طول العمر.. زيه زى الاحتياج للأكل والشرب.. وزيه زى الاحتياج للحب والاحتياج للقبول والاحتياج للاهتمام..
فى المتوسط..علشان نعيش بالحد الأدنى من الصحة الجسدية والسلامة النفسية.. كل واحد فينا محتاج 4 أحضان فى اليوم.. والاربعة دول لو بقوا 8 يبقى ده كفيل بدوام واستمرار و(صيانة) صحتنا الجسدية والنفسية.. لكن علشان اكتمال النمو الصحى وتمام النضج النفسى محتاجين 12 حضن يوميا..صباح الفل!
طبعا أنا مش عاوز أقلب المقال لمحاضرة علمية أكاديمية وأقول إن الحضن بيحفز افراز هرمونات السعادة..وانه بيقوى المناعة ويساعد على ارتخاء العضلات.. ويساعد على توازن الجهاز العصبى وانه بيخفف التوتر.. لا..مش كده بس.. أنا عاوز أقول اللى أعمق من كده..
الحضن.. دفا.. دفا جسدى.. ودفا نفسى.. وكأنك بتحط كمادات مية دافية على جراح حياتك.. وإصابات يومك. .وكدمات علاقاتك..
الحضن علاقة فى حد ذاته.. فيها أخذ وفيها عطاء.. فيها رسايل رايحة جاية.. فيها شوفان وقبول واحترام واحتواء..
الحضن.. وجبة غذائية نفسية متكاملة.. فيها كل أنواع المقويات والفيتامينات والبروتينات (النفسية)..
الحضن..هو البديل اليومى المتاح لعودتك داخل الرحم مرة أخرى (ودى رغبة موجودة عندنا كلنا).. لما كان الأمان والدفا والاحتواء والشبع موجودين بكل بساطة وبدون عناء ولا مشقة ولا تعب.. وجود دائم لا ينقطع..
الحضن.. يعنى أصلاً انك موجود.. إنك تستاهل تكون موجود.. وإنك تستاهل تتحضن.. تستاهل هذه المنحة الربانية بين إيدين حد بتحبه..
الحضن أمان. .درع حماية.. سترة واقية من رصاص الألم.. وصقيع الحياة..
الحضن فرحة.. وبهجة.. وطاقة متجددة فى أوردة نفسك وشرايين روحك..
الحضن.. أمل..
الحضن عزاء.. وطبطبة.. وترياق ناجع لهموم الليالى.. وسموم الأيام..
الحضن قبول.. واهتمام.. وحب.. وسماح.. ورضا..
الحضن لغة.. والحضن له لغة..
الحضن.. شفرة المحبين..
نقول كمان..
الحضن احتياج إنسانى لا غنى عنه.. وأول مصدر لإشباع هذا الاحتياج الإنسانى هو الأم (اللى حضنها بيدى الدفا والشبع والاحتواء والأمل).. والأب (اللى حضنه بيدى القوة والجدعنة والحماس والإصرار).. وبعدين الاخوات والأصدقاء والأحبة والأزواج وغيرهم..
كثير من المرضى النفسيين كل اللى ورا أعراضهم وأمراضهم النفسية العويصة..احتياج لحضن..فقط احتياج لحضن..والاحتياج ده لم يتم إشباعه من الأم والأب أساسا..
بعض اللى بيجيلهم اكتئاب.. بعض اللى بيجيلهم توتر وأرق.. وحتى بعض اللى بيحصلهم هلاوس سمعية وبصرية.. بيكون أحد الاحتياجات الأساسية الغير مشبعة عندهم.. هو الاحتياج للحضن..
ساعات اللى بتبيع نفسها..أو بتدخل فى علاقات مشوهة ومختزلة.. بتعمل كده، علشان بس تتحضن..حضن تحس فيه إنها موجودة..
ساعات اللى بيعمل أو بتعمل علاقات مثلية جنسية.. بيكون كل اللى بيدور عليه (على مستوى غير واعى) حضن من رجل يمثل ليه الأب.. أو حضن من أنثى تمثل ليها الأم..
ده كمان ساعات اللى بيدمن.. مش بيدور فى مادته المخدرة إلا على اللى مالقهوش فى حضن أبوه وأمه (الشبع والرضا).. بس مالقاش ده مع بنى آميين.. ولاقاه فى مادة بكماء صماء.. من كتر ماهو محتاج..
ماتحرموش نفسكم من الحضن..
ماتحرموش أبناءكم وبناتكم من الحضن..
ماتحرموش أصحابكم وحبايبكم من الحضن..
ماتحرومش أزواجكم وزوجاتكم من الحضن..
علشان التمن ممكن يكون غالى..
غالى أوى من غير ما ناخد بالنا
