“أنا مش بشرب الحاجات دي أصلا” .. كيف دافعت منة شلبي عن نفسها بعد القبض عليها؟

أصدرت النيابة العامة، أمس الأربعاء ، قرارها بإحالة المتهمة منة شلبي للمحاكمة الجنائية، لمعاقبتها بسبب إحرازها جوهر الحشيش المخدر بقصد التعاطي.

ورصدت وسائل الإعلام اعترافات منة شلبي بعد القبض عليها في المطار يوم 25 نوفمبر الماضي، حيث قالت الفنانة منة شلبي، في اتهامها بحيازة مواد مخدرة بمطار القاهرة، إنها كانت في نيويورك لحضور مهرجان “انتر ناشونال” وأثناء عودتها للبلاد تم احتجازها في غرفة والأمن وقتها.

وتابعت، في أقوالها: “وأنا في مطار القاهرة عديت على الجمارك، وأنا خارجة وكان معايا تلات شنط والدنيا كانت زحمة وأنا حطيت الشنط اللي معايا على السير علشان يتشاف فيها إيه، ولقيت واحد من اللي واقفين في الجمرك بيقولي معاكي فيب سجارة إلكترونية، فأنا قولتله إني بدخن فيب، وكنت بفتح الشنطة علشان أوريله الفيب، فلقيت واحد تاني جه وقالي إحنا هنفتح بقية الشنط نشوفها وأنا وافقت وقولتله اتفضل، وقعد يقلب في الشنط وبعدين جه واحد تالت كان بيفتش معاهم وأنا طلعت الفيب السجاير الإلكترونية وواحد منهم قالي ممكن تقعدي شوية ووداني أوضة في الجمارك قعدت فيها شوية والشنط كانت معاهم في الوقت ده”.

وأكملت منة شلبي في أقوالها “لقيت ناس كتير وظباط مطلعين علبة ميكب لونها أخضر بيقولولي إن دي فيها ماريجونا فقولتله مفيش الكلام ده مش صح وده ميكب عادي بعدين لقيته بيقولي معاكي كوكايين، قولتله أنا مش بشرب الحاجات دي أصلا وبعدين قالولي طيب استني شوية، وبقيت سامعة کلام کتیر بره، وبعد ساعتين تلاتة لقيتهم بيقلولي اطلبي المحامي بتاعك فبقولهم إيه اللي حصل، قالولي إنتي معاكي ماريجوانا، وبعدين قالي إنتي هتتعرضي على النيابة، في الوقت ده أنا كنت قاعدة فلقيت أخبار نازلة إني مقبوض عليا ومعايا مخدرات وفضلت هناك لحد اما جيت هنا واتعرضت على النيابة”.

وكانت النيابة العامة أمرت اليوم بإحالة المتهمة منة شلبي للمحاكمة الجنائية، لمعاقبتها على ما أسند إليها من إحرازها جوهر الحشيش المخدِّر بقصد التعاطي في غير الأحوال المصرَّح بها قانونًا.

وقد أقامت النيابة العامة الدليل قبلها من شهادة خمسة شهود على الواقعة، وما توصلَّت إليه تحريات الشرطة، وما ثبت بتسجيلات آلات المراقبة بمحل ضبطها، فضلًا عمَّا أسفر عنه فحص المعمل الكيماوي للمضبوطات المعثور عليها بحوزتها.

وكانت النيابة العامة قد استكملت تحقيقاتها بعد ضبط المتهمة بالاستماع لشهادة خمسة من العاملين بمطار القاهرة الدوليّ، والتي كان حاصلها أن فحص حقائب المتهمة بجهاز الأشعة أثناء إنهائها الإجراءات الجمركية ظهر خلاله وجود كثافات عضوية بداخلها، فتم تفتيشها تفتيشًا دقيقًا أسفر عن العثور على مواد مخدِّرة بالحقائب.