محمد البقري يكتب.. يا معالي الوزير الشعب مش عايز صدام الشعب عايز حنان!
الطريق الإقليمي لم يعد مجرد شريان مروري بل تحول إلى جرح نازف في قلب كل بيت مصري بعد حادث مأساوي راح ضحيته 19 زهرة من بنات مصر من العاملات البسيطات. بنات لقمة العيش اللي خرجوا على أمل يرجعوا في آخر اليوم بلقمة شريفة يساعدوا بيها نفسهم وأهاليهم لكن رجعوا في أكفان.
وفي وسط الحزن اللي مصر كلها عايشاه طلع علينا وزير النقل الفريق كامل الوزير بتصريحات حملت القسوة أكثر من التعاطف والنقد أكثر من العزاء.
نعم الوزير رجل دولة من طراز رفيع وله في قلوبنا مكانة بسبب إنجازاته ومجهوده الجبار، ولكن يا معالي الوزير وقت الحزن مش وقت تعنيف ووقت الكارثة مش وقت لوم.
الناس يا سيادة الوزير مش ضد النظام ولا ضد القانون ولا بتدافع عن خطأ لكن الناس موجوعة.
الشعب مش ناقص وجع جديد ولا خطاب قاسي خصوصًا في وقت دفن فيه بناته بإيديه.
إحنا في وقت محتاجين فيه مسؤولين يكلمونا من القلب بلغة فيها دفء وإنسانية مش لغة أوامر وتحذيرات.
الحزن كان محتاج حضن مش تحقيق
الناس كانت مستنية منك كلمة طيبة دمعة حقيقية مش عتاب جارح.
إحنا في وقت لازم فيه المسؤول ينزل من برجه العالي ويحس بنبض الشارع.
الوزير بكل ما يملك من قوة وقدرة على الإنجاز مدعو أن يوازن بين الحزم والرحمة ، بين الإدارة الصارمة والإنصات الرحيم ، لأن الشعب يا معالي الوزير مش بس عايز طريق مرصوف الشعب عايز مسؤول يحن عليه وقت المصيبة.
ختامًا.. احترامنا لك لا يمنعنا من العتاب وحبنا للوطن هو اللي بيدفعنا للكلمة الصادقة.
علشان تفضل دايمًا في صف الناس تسمع قبل ما ترد وتحنو قبل ما تحاسب.
