أقلام حائرة

هو أحنا أمتي كبرنا؟!!!

 

بقلم : أمل النجار

معقول دا شكلنا ولا دا حد غيرنا

 

دا احنا أمبارح كنا لسه صغيرين

 

بنجري ونلعب وأحنا فرحانين

 

بس ليه فجأه الهم بقي مالي قلوبنا

 

والدموع خلتنا تعبنا ودوبنا

 

هو أحنا كبرنا بجد والدنيا توهتنا

 

ولا دا حلم وهنصحي منه وهنكمل لعبتنا

 

بس الدنيا من حوالينا بجد اتغيرت

 

في ناس أول مره نشوفها وناس تاني أتغربت

 

بس الناس دولا بجد وحشونا

 

نفسنا نشوفهم تاني وف حضنهم ياخدونا

 

ونفسنا نسمع صوتهم وهما بينادونا

 

بس خلاص شكلهم كده بعدوا وسابونا

 

وحتي اصحابنا من أيام زمان

 

مالهم كده نسيونا ونسيوا اللي كان

 

دا احنا عشنا مع بعض سنين وسنين

 

وكنا دايما مع بعض واحنا صغيرين

 

دا أحنا ياما مع بعض فرحنا ولعبنا

 

وكنا دايما بنتخانق بس عمرنا مازعلنا

 

حتي المدرسة اللي ياما قولنا عليها مش كويسة

 

دلوقتي نفسنا نروحلها ونرجعلها

 

ونبكي بدموع العين ونتأسفلها

 

علي العمر اللي ضاع من أيدينا

 

لما كنا مش بنسمعلها وهيا بتنادينا

 

ودلوقتي الحزن وألألم مالي عنينا

 

ياريت كل دي تكون أوهام

 

ونفتح عنينا ونلاقي أنها احلام

 

ونصحي الصبح ونلبس هدومنا

 

وناخد كتبنا وقلمنا وشنطتنا

 

ونجري عشان نقف في طابور الصباح

 

ونحيي العلم وقلبنا مفيهوش غير الافراح

 

وندخل الفصل ونقعد جنب بعضنا

 

والفرحه والبراءه مليا عنينا وقلبنا

 

مستنيين جرس الفسحه لما يدق

 

عشان نجري ونفرح وفي بعضنا نضرب ونزق

 

وأول ماا………

 

استني استني دا احنا فعلا كبرنا

 

وكل دي كانت ذكريات بتعذبنا

 

بس السؤال اللي بجد تاعبنا

 

هو أحنا أمتي كبرنا؟؟

اترك تعليقاً

زر الذهاب إلى الأعلى
Verified by MonsterInsights