حوادثسلايدر

قضية شاب ديرب نجم.. متهم بوصل أمانه مزور.. ومصيره في خطر و المدعي “هربان”

كتب : محمود غنيم

“السيد سعيد أحمد محمود” شاب ببداية عقده الرابع، وسائق عربية جامبو يعمل عليها لحساب صاحبها الشحات احمد حسن، في تجارة السمك، كان كل أمله في الحياة أن يعيش مستورا ويرعي إبنه الوحيد فارس الذي لم يكمل عامه الأول بعد وزوجته عفاف –ربة منزل-ولكن شاءت الأقدار أن ترسم له طريقا غير الذي أراد.

السيد كانت طبيعة عمله أنه دائم التنقل  من أجل إحضار وبيع السمك-لقمه عيشه-، ولكنه إكتشف من أحد جيرانه أن رب عمله يستخدم شقته في غيابه في أعمال الرذيلة، وقام السيد بتشغيل الموبايل علي وضعية الفيديو وتركه مخبأ بالشقة، ليكتشف بالفعل أن جيرانه لم يكونوا كاذبين، وأن رب عمله فاسد منحل. السيد لجأ إلينا لعرض قضيته وكل ما يأتي علي لسانه

يقول السيد:” واجهته باللي عمله وعملت محضر فيه عشان اثبت للجيران اني معرفش اللي كان بيعمله، لأنهم بيحترموني ، خد 3 شهور وبعدين عمل معارضة وخد براءة.

ويكمل:” بعدها بفترة لقيته شاكيني بوصل أمانه مزور وقيمته 300 ألف، قولتله دا مضروب قالي أنا هعرف اخلي المضروب حقيقي بالفلوس، وبالفعل قدم الوصل للشرطة ولكن لم يتم إعلاني،وتفاجأت بالمخبرين جايين ياخدوني ويقولولي عليك حكم 3 سنين، فعملت معارضة واطلعت علي الوصل وبالفعل إنه نفس الوصل المزور وفرحت، ولكن خبير الكتابة أخبر القاضي بأن الوصل صحيح، وهنا يشكو” حسبي الله ونعم الوكيل”، فطلبت من القاضي الاستعانه بلجنة ثلاثية، لأن المحامي الخاص بي أخبرني أنه كانت هناك نفس قضيتي وعندما تمت الاستعانة باللجنه ، أثبت خبير البصمات أن العقد مزور، فطلبت من القاضي أن أستعين بلجنه ثلاثية لاثبات برائتي مثلما حدث في القضية المشابهة.

وهنا يتعجب:” ولكن الغريب أن القاضي رفض أن استعين بجلنة ثلاثية، وحكم عليا بثلاث سنين وكفاله 5000 جنيه، ولكني إستأنفت.

وهنا ياتي دور زوجته لتكمل:” روحت مضيت علي ورقة لأخويا بحقي في الميراث، واخدت الفلوس ودفعتله الكفاله، وإنا مصدقاه وإن شاء الله معاه لحد ما يثبت برائته.

وواصل السيد:” من كام يوم الراجل بعت ليا مرسال مع واحد صاحبي إسمه عمرو شلبي،وقالي لو دفعت 25ألف هتنازل، بس أنا مش معايا المبلغ ده والله،

وعن سؤالي عن والديه أجاب :” والدتي عامله عملية القلب وربنا يستر بقي لو اتحكم عليا معرفش هيحصل لها ايه، وهي عايشة مع والدي في الزقازيق، ولما كنت بسافر كنت بودي مراتي تقعد معاهم، وده سبب استغلال صاحب الشغل الفرصة وفعل ما فعل.

وعن كيفية دخول صاحب العمل الشقة علل السيد:” واضح إنه استغل اني كنت بسيب المفاتيح في العربية كتير وأخد المفتاح وطلع عليه نسخة.

وبخصوص صاحب العمل قال السيد :” إسمه الشحات أحمد حسن 42 سنة من ههيا، وهو هربان دلوقتي عشان كان ناصب علي تجار كبار في شرم الشيخ، وكلم المحامي بتاعه وقاله خليه يدفع الفلوس اللي أنا صرفتها علي القضية وأنا هخرجه، والمحامي بدوره أخبر صديقي.

ويختتم السيد حديثه بقول:” نفسي حد من المسؤولين يشوف قضيتي، ووالله أنا برئ ونفسي القاضي يرضي باللجنة الثلاثية، وهي هتثبت البراءة، ونفسي لو لقدر الله حصل واتحبست إن حد يسأل عن زوجتي وإبني ملهمش غيري، لأن اخوها بيكرهها هو ومراته، وامل التدخل قبل فوات الاوان.

يذكر أن الحكم النهائي في تلك القضية سوف يصدر يوم السبت القادم 12/1 بمحكمة ديرب نجم.

اترك تعليقاً

زر الذهاب إلى الأعلى
Verified by MonsterInsights