أوضح محمود عبد المنعم كهربا صانع ألعاب النادى الأهلى، سر بكاءه بعد تتويج الأهلى بلقب كأس مصر، بعد الفوز على طلائع الجيش بركلات الجزاء الترجيحية بنتيجة 3/2، وقال كهربا فى تصريحات لبرنامج “ملعب أون تايم” مع الإعلامى سيف زاهر:عيطت عشان الكأس ده كان الخامس بالنسبالى بعد ما توجت به مرة مع إنبى و3 مع الزمالك ومرة مع الأهلى، وده حاجة قياسية وكل بطولة مع الأهلى لازم نكسبها، وكان فى ضغوطات كبيرة وصعب عليا نفسى.
أضاف: جمهور الزمالك بحبهم وبحترمهم وما شافوش منى حاجة وحشة، وجمهور الأهلى فى حتة تانية خالص وهما زي عيلتى الثانية.
وأكد محمود عبد المنعم كهربا، أن الفريق دخل أجواء البطولات مبكرًا وأفراح الفوز ببطولتي دوري أبطال إفريقيا وكأس مصر انتهت، ونجح الفريق في تحقيق الفوز على مصر المقاصة بثلاثة أهداف مقابل هدف، في الجولة الأولى من مسابقة الدوري الممتاز.
وأضاف كهربا أن البداية دائمًا ما تكون صعبة، ونجح الأهلي في تحقيق فوز مهم في انطلاق مسابقة الدوري الممتاز، أمام فريق بحجم مصر المقاصة، والذي قدم عروضًا قوية في المسابقة خلال السنوات الماضية.
وأوضح كهربا أن بيتسو موسيماني، المدير الفني للفريق، دائمًا ما تنصب تعليماته على التحرك في الشق الهجومي وتبادل المراكز، وهو ما وضح خلال مباراة مصر المقاصة.
وأشار لاعب الأهلي إلى أن الأداء سوف يتحسن مع مرور الوقت، والفوز بالثلاث نقاط في بداية مسابقة الدوري هو الأهم.
واختتم محمود كهربا تصريحاته بالتأكيد أن الاحتفالات انتهت، والفريق يعيش حالة من التركيز للتحديات الجديدة، التي بدأت بمواجهة مصر المقاصة في الجولة الأولى من بطولة الدوري الممتاز.
كهربا: كنت حاسس ان معمولى عمل فى الزمالك
كشف محمود عبد المنعم كهربا صانع ألعاب النادى الأهلى عن كواليس انضمامه إلى القلعة الحمراء، وقال كهربا فى تصريحات لبرنامج “ملعب أون تايم” مع الإعلامى سيف زاهر: قلت لموسميانى أول يوم ليه فى التمرين انى ممكن إمكانياتى ما تأهلنيش للعب لكن عاملنى بس كويس أهم حاجة نفسياً ومن وقتها فعلاً عاملنى بشكل كويس، وضحيت باستكمال الاحتراف فى الدورى السعودى عشان أخد بطولات مع الزمالك، والدورى السعودى كان أجمل أيام حياتى، وكنت قاعد لوحدى ووالدى ووالدتى كانوا بيترددو على زيارتى على طول كل شهر عشان يعملوا حج وعمره، وبحلم أرجع اتحاد جدة تاني لكن بعد ما أخد كل حاجة مع الأهلى.
أضاف: أمير توفيق تحدث معى فى بداية موسم الانتقالات فى يناير، ووكيلى قاله كهربا كان مستنى اليوم ده من شهر، وبعد الاتفاق مع أمير قعدت مع كابتن الخطيب وقالى انت ابن النادى وشد حيلك وادانى دفعه، والواحد بيتمنى انه يشوفه أصلاً، شوفته فى السعودية ومرة وانا صغير فى البرنامج بتاعه، وهو بيتكلم معايا كان أحلى يوم فى حياتى.
واصل: استريحت مع فايلر بعد ما رجع بعد كورونا، وكان بيلعبنى أساسى وبيحبنى، وهو اللى طلب انضمامى للأهلى، لكن كانت المشكلة كلها ان كان ليا مشكلة مع جروس وهو سويسرى زيه، وعشان كده انا روحت كلمته وقولتله فيه مشكلة أو حد قالك عنى حاجة، قالى لا، فقولتله خلاص ادينى فرصة وفعلا منحنى الفرصة بعد كورونا.
واختتم: فى الزمالك كنت مؤمن بالسحر وبخاف جداً، وكانت بتحصل معايا حاجات غريبة، وكنت حاسس ان حد عاملى عمل وكان فى مواقف كتير مش فاهم فيها نفسى، والدنيا دلوقتى أحسن بكتير.
