هو احنا مشكلتنا ايه و فين؟
السؤال ده في دماغي بقاله كتير اوي وكنت بحاول اوصل لأجابه بس مش عارف
هي المشكلة عندنا في السياسة ولا في الشعب و لا في الأتنين ؟
ولا احنا بنطلب حاجات من الخيال
ولا محدش سامع صوتنا علشان يعرف طلباتنا ؟
انا مش محلل نفسي ولا سياسي ولا مجتمعي ولا غاوي فلسفة ومليش في الفزلكة ووجع الدماغ
بس قعدت فترة اتفرج علي اللي الناس اللي حواليا و التصرفات و النقاشات و الافكار المختلفه العقيمة من كل الطبقات لحد ما اتأكدت وعن اقتناع شخصي ان مشكلة مصر في اهلها
ايوه احنا دولة مريضة بشعبها وبيرفض العلاج
وهقولكم ازاي و فكروا هتلاقوا نفسكم عملتوا اللي هقولوا ده.
احنا شعب عنصري في تفكيره وتعامله وطبعا ده مالوش علاقه بالسياسة خالص فحاجه
دي تربية واسلوب عيشه يعني مثلا اي حد يتعرف علي اي حد بعد شويه يبتدي يسأل هو انت مسلم ولا مسيحي .. فقير و لا غني ساكن في حته نضيفه ولا مكان من العشوائيات او الأماكن المظلومه .. واهلاوي ولا زملكاوي طبعا مع وضع ان الكره قامت بسببها خناقات كتير بين الصحاب و بعضها واحيانا ناس بتموت فيها وعشانها .. ويا تري بيلبس منين و بيخرج فين وبياكل ايه وعايش ازاي ؟
كلها اسئله ملهاش أي علاقة بأي حاجة.. اسئلة ولا هتفيد اي حد ولا هتضر أي حد .. اسئلة ملهاش علاقة في تقييم اي شخص كلها اسئله مظهريه وبس
لكن حد بقي سأل ده دارس ايه وبيفكر في ايه ولا ثقافته ايه اواتناقش ازاي معاه نقاش عام يبان فيه وجهات النظر بتاعة كل شخص فتقدر تحكم علي الشخص اللي قدامك . هل هو مثقف و صاحب وجهة نظر في الحياه ولا شخص تافه و بلا هدف.
احنا مجتمع ملخبط في قيمه و عاداته و تقاليده وكله بيتكلم علي بعضه .. وكله بينتقد بعضه .. وكله بيراقب بعضه .. وكله بيحقد علي كله .. وكله بينم علي كله .. وده سبب كل المشاكل
ومحدش مقتنع بحاله مع الوضع في الأعتبار ان هناك فرق كبير بين الطموح وعدم الرضا الطموح انك تحارب و تشتغل و تجاهد علشان توصل لهدفك و عدم الرضا اللي هو عند 99% مننا اننا مش عاجبنا حالنا و باصيين لغيرنا
وعمالين نقول يارب ابقي زي فلان ولا علان طب مانشتغل علشان نوصل لفلان ولا علان
طب تخيل معايا لو بتخرج مع واحد وصاحبك جدا و ابن ناس ولبسه اشيك حاجه وكله براندات بس متعرفش شغال ايه و بعد فتره اكتشفت انه سباك او نجار او ميكانيكي
اول حاجه هتعملها انك هتبعد عنه و السبب انك مش عاوز الناس تقول عليك انك مصاحب حد من الناس دي
مع ان لولا الناس دي كان زمانك بتلطم في بيتكم علشان السباكه باظت ولا عربيتك علشان عطلت و هكذا
نظره سطحيه طبقيه مريضه من مجتمع مريض فاسد علي العلم ان اي واحد فينا لما بيسافر برا و هو مش مظبط شغلانه في اوروبا او امريكا بيقف يلف بضاعه في سوبر ماركت او يمسح ارض في اوتيلات او في بنزينه و تلاقيه مش قادر يفتح بقه اصلا
بس علشان هناك في احترام للانسان و شخصيته مش للبسه ولا فلوسه ولا تعليمه فتلاقي الناس بتتعامل مع بعض باحترام
مع انك يا اخي لو عملت هنا كده هتلاقي بدل الفرصه مليون وهتبقي وسط اهلك وناسك و عايش بس ازاي اصل البيه خريج جامعي و لازم يشتغل بالشهادة ..
الشهاده اللي كلنا اخدناها بس علشان يتقال علينا خريج جامعي و صاحب مؤهل عالي مش متوسط او صنايع
نفس الفكر المظهري الطبقي المتخلف.
و في امثلة كتير اكتر من كده لو قعدنا نقولها عاوزين بتاع سنتين كتابه متواصلة ومتجيش تقولي الجهل ده سببه الدوله علشان بأختصار انا بتكلم في جهل فكري مش جهل علمي
الجهل العلمي كلنا و الحمد لله جهله علميا لكن فكريا هتلاقي ناس هنا عندها فكر و وجهات نظر بس نسبه ضعيفه أوي . لأن الغالبية العظمي كل همها الأكل و الشرب و الجواز وجسم فلانة وسمعة فلانة . وفلانة اطلقت وفلانة كذا وكذا .
الحل في رأيي المتواضع المتخلف هو تربية الجيل اللي طالع علي قواعد جديده وهي باختصار
عامل الشخص اللي قدامك زي ما هو مالكش علاقه بدينه ولا لبسه ولا مستواه الاجتماعي ولا ولا ولا ولا … هو بشخصيته و عقليته و تفكيره وبس .. ولو ده حصل صدقوني حاجات كتير هتتغير
