كشف المطرب تامر حسني، اليوم الجمعة، عن آخر تطورات الحالة الصحية لـ نجله آدم، والذي تعرض لوعكة صحية خلال الأيام الماضية، بسبب انفجار الزائدة الدودية، وأجرى على إثرها عمليتين جراحيتين.
وكتب تامر حسني، عبر خاصية “ستوري” على حسابه بموقع تبادل الصور والفيديوهات “إنستجرام”: “لكل الغاليين اللي اهتموا بتعب ابني.. الوضع مستقر بعد العملية التانية وخرج من العناية المركزة بفضل الله ثم دعواتكم اللي لو عشت أشكركم عمري كله مش هوفي حقكم وربنا يتمم الشفاء على خير”.
واختتم قائلا: “ودايما بقول على دعواتكم الكريمة: لكم مثلها وأضعاف أضعافها.. شكراً يا أغلى الناس ربنا يحفظكم ويحفظ ولادكم قادر يا كريم”.
وكان “نجم الجيل”، قد تحدث عن تفاصيل ما حدث لنجله، عبر منشور له على “فيس بوك” قال فيه: “أنا مش عارف أشكركم إزاي على كمّ الدعوات اللي دعيتوها لربنا لشفاء آدم ابني اللي جاتلي منكم هنا وعلى تليفوني وتليفونات كل المحيطين بيا هو عمل عمليتين كبار بسبب انفجار الزايدة المفاجئ، اللي كانت أعراضه سخونية عادية بس وبقولكم كده عشان تبقوا حريصين مع نفسكم أكتر ولولادكم. ومش كل سخونية تقولوا ده شوية برد، وخلاص لا روحوا اكشفوا كويس و اعملوا سونار على البطن و الزايدة مرة و٢ عشان برضو ساعات مش بيبان ولازم الدكتور يضغط بطريقة معيّنة، تقريباً أقوى شوية عشان يعرف لإني سمعت كتير اليومين دول إن الزايدة خادعة”.
وأضاف: “اطمنوا كذا مرة قبل لحظة انفجارها عشان بجد مشاكل بتحصل بعدها كبيرة ومحزنة أوي، وحبيبي آدم عمل عمليتين صعبين أوي عليه وبدعواتكم مستنيين النتايج تكون خير يارب و يعدي مرحلة الخطر يارب، بحق كن فيكون اشفيه وعافيه، هو وكل ولادنا بس هو راجل وهيتحمل وإن شاء الله ربنا يكرمه ويعافيه ويحفظه هو وإخواته ويحفظ كل ولادكم يارب”.
واختتم تامر حسني: “وأحب أقول تاني شكراً من كل قلبي على دعواتكم.. أنا شايف قلب كل حد فيكم و هو بيدعي بصدق متشكر أوي يا جماعة شكراً لكل اللي اهتم وسأل عن ابني و دعاله هنا أو على التليفون واللي طلعوله صدقات لشفائه من غير ما يعرفونا شخصياً أنا مش لاقي كلام أشكركم بيه و أنا برضو بدعيلكم وبقول لكم مثلها وأضعاف أضعافها وربنا يحفظكم ويحفظ أولادكم قادر يا كريم”.
اقرا ايضا:
أحمد زاهر يطلب الدعاء لابن تامر حسني وابنته ملك: اللهم شفاء لا يغادر سقماً”
