الحلقة الأولى: الصدمة مش نهاية العالم

كتبت : الإعلامية سهي يوسف 
أهلا بيك في
(رميم الروح)
الرحلة اللي هنحاول فيها نلملم نفسنا بعد الصدمات ونشوف إزاي ممكن نعيد البناء من جديد

كلنا مرينا بلحظات وجع لحظات تحس فيها إن الأرض تزلزلت تحت رجليك وإنك مش عارف تكمّل ممكن يكون فقدان شخص غالي خيانة من حد كنت واثق فيه خسارة حلم كنت شايفه قدامك وطار فجأة أو حتى إحساس بالخذلان من الحياة نفسها ساعتها بتحس إنك متجمد الدنيا ماشية حواليك بس إنت مش قادر تتحرك

بس خليني أقولك حاجة اللي إنت فيه طبيعي الصدمة بتحصل لما حاجة فوق طاقة احتمالنا تهزنا فجأة وعقلنا مبيكونش مستوعب اللي حصل زي ما تكون ماشي في طريق وفجأة تلاقي حفرة كبيرة قدامك فتقف مش عارف تعديها إزاي

اللي بيحصل جوانا وقت الصدمة بيكون زي العاصفة مشاعر متلخبطة حزن خوف غضب لوم للنفس أو للناس أو حتى لربنا ساعات بنحس إننا عايزين نختفي أو نهرب من كل حاجة حوالينا وساعات بنقنع نفسنا إننا كويسين ونحاول نكمل حياتنا كأن مفيش حاجة حصلت

لكن الحقيقة
إن التظاهر بالقوة مش حل

لو وقعت خد وقتك على الأرض بس متفضلش واقع إنت مش ضعيف عشان بتتوجع ومش المفروض تقاوم الشعور بالحزن الألم جزء من التجربة الإنسانية جزء من كونك بني آدم ليه مشاعر وأحلام واتخذل فيها أو خسرها

خليني أقولك ٣ حاجات ممكن تساعدك في أول خطوة للخروج من الصدمة

1. اسمح لنفسك تحس

متقولش مش لازم أزعل أو لازم أنسى بسرعة الألم محتاج مساحة لما تحس الوجع وتقبله هيبدأ يخف اللي بيحصل جواك طبيعي ومتخليش حد يقولك غير كده

2. اتكلم متكتمش

مش لازم تواجه ده لوحدك احكي لشخص تثق فيه حتى لو مش هيديلك حلول مجرد الفضفضة أحيانًا بتبقى أول خطوة للشفاء ولو مش قادر تحكي اكتب طلع اللي جواك بأي طريقة بس متسيبوش يتراكم جواك

3. متتسرعش في أخد القرارات